有日一位女士同位外傭一齊嚟到診所。
女士：「同佢寫轉信」
我：「請問需要寫咩信呀？」
女士瞪大對眼：「佢話佢有咗喎！」
我：「想驗孕寫證明信係咪？」
女士：「驗啦！驗真啲呀！係有咗嘅話就即炒佢呀！一毫子都唔會俾呀我」
咦，咁好似唔得喎，要炒都好似要賠錢呀？
外傭冇出聲一直低頭。
女士：「姑娘，佢想繼續做嘅就一陣俾醫生即刻落咗佢！」
點樣即刻落呀？轟佢幾拳嗎？
我：「我哋做到嘅淨係驗孕同寫證明，如果係要做其他嘅可以轉介嘅…」
女士：「轉介嘅有冇得今日做呀？我要返工㗎，今日已經係專登請假，我冇第二日㗎啦」
我：「都唔會即刻今日做到㗎，你都要再去嗰邊再約時間，同埋呢啲要佢自己決定」
女士：「我係佢老細呀」
所以你老闆都係嗌你做咩就要做咩？嗌你去死就要去死？
我都廢事啋佢：「嗯，咁而家驗咗孕先？俾身分證我登記先呀」
女士好大聲：「今日要即刻落咗佢呀！我冇咁多時間同你玩呀！」
女士大聲問外傭：「你仲要唔要喺度做呀？你係咪食我住我呀？你唔落我就掉你返去㗎啦，機票錢我俾唔起咩？」
外傭冇出聲。
女士再問我：「我要今日即刻落咗佢，你做唔做到，你做唔到我俾錢第二個做兼以後唔會再嚟！我俾一分鐘時間你諗清楚」
我：「唔好意思，我哋診所真係冇得做」
佢捉住外傭離開診所。
我俾夠兩分鐘你慢慢行出診所。其實呢啲位…話事嗰個真係唔係你…
Search